"विरह-गीत"(बरखा-गीत)

 झमाझम बरसै बदरिया हो नाहीं आयिनि संवरिया ।

लह-लह लहरै डगरिया हो नाहीं आयिनि संवरिया ।।

पवन झकोरै जौ सिहरनि लागै

सगरी देहियां म भलु पीरा जागै

रहि- रहि भभकै सेजरिया हो नाहीं आयिनि संवरिया ।। लह-लह लहरै-----

यादु सतावै यैसि चिहुँकु जायि छाती 

केहिका बिसूरै जिया हौ बहु कलपाती 

सहमि-सहमि जायि निंदरिया हो नाहीं आयिनि संवरिया ।।

लह-लह लहरै------

जुगनूँ राह-डगरि चमकावैयिं 

दादुर-झींगुर बहु शोर मचावैयिं

छमाछम बाजतु पयलिया हो नाहीं आयिनि संवरिया ।। लह-लह लहरै-------

लरिकनु छपाछपि अंगना म खेलैयिं 

कगजे कै नैइया भलु पनिया मेलैयिं 

लुकाछिपी खेलतु नजरिया हो नाहीं आयिनि संवरिया ।।

लह-लह लहरै-------

भूलि गयिनि सबै  सजना-संवरना 

कबु लौटि अउब्या अहै ईहै झंखुना 

तकि-तकि हारीं नजरिया हो नाहीं आयिनि संवरिया ।।

लह-लह लहरै-------

झमाझम बरसै बदरिया हो नाहीं आयिनि संवरिया ।

लह-लह लहरै डगरिया हो नाहीं आयिनि संवरिया ।।

Written by ज्ञानेन्द्र पाण्डेय